ဂျပန်တွင် တိုင်ဖွန်းရှန်ရှန်း ဝင်ရောက်တိုက်ခတ်မှုကြောင့်...
တိုင်ဖွန်းရှန်ရှန်းသည် သြဂုတ် ၃၀ ရက် တွင် အပူပိုင်းမုန်တိုင်းအဖြစ် အားလျော့သွားခဲ့သော်လည်း ဂျပန်နိုင်ငံကို တဖြည်းဖြည်း ဖြတ်သန်းဝင်ရောက်ချိန်တွင် မိုးသည်းထန်စွာ ရွာသွန်းမှုများကို ဖြစ်ပေါ်စေသည့်အတွက် လမ်းပန်းဆက်သွယ်ရေး ပြတ်တောက်မှုများ ကြုံတွေ့ခဲ့ပြီး မြေပြိုမှုသတိပေးချက်များ ထုတ်ပြန်ထားကာ သေဆုံးသူခြောက်ဦးအထိ ရှိလာခဲ့သည်။ ဂျပန်တွင် ဆယ်စုနှစ်ပေါင်းများစွာအတွင်း အပြင်းထန်ဆုံးမုန်တိုင်းများမှတစ်ခုအဖြစ် ဝင်ရောက်လာသည့် တိုင်ဖွန်းရှန်ရှန်းသည် သြဂုတ် ၂၉ ရက်တွင် ကျူရှုကျွန်းကို ဝင်ရောက်လာချိန်တွင် လေတိုက်နှုန်းသည်တစ် နာရီလျှင် ၂၅၂ ကီလိုမီတာ(၁၅၇ မိုင်)နှုန်း အထိရှိခဲ့သည်။ သြဂုတ် ၃၀ ရက်တွင်မူ တိုင်ဖွန်း ရှန်ရှန်းသည် ကျွန်းစုသို့ ရွေ့လျားလာချိန်တွင် လေတိုက်နှုန်းသည် တစ်နာရီလျှင် ၁၀၈ ကီလို မီတာနှုန်းအထိ လျော့ကျ လာခဲ့သည်။ တိုင်ဖွန်းမဝင်ရောက်မီ မုန်တိုင်းနှင့် ဆက်နွှယ်၍ မိုးသည်းထန်စွာ ရွာသွန်းပြီး မြေပြိုမှုတစ်ခုကြောင့် အိုက်ချိစီရင်စုမှ မိသားစုတစ်စုအတွင်းရှိ မိသားစုဝင်သုံးဦး သေဆုံးခဲ့သည်။ အစိုးရပြောရေးဆိုခွင့်ရှိသူ ယိုရှီမာဆာ ဟာရာရှီက နောက်ထပ်သေဆုံးသူတစ်ဦးရှိကြောင်း ပြောကြားခဲ့သော် လည်း တိုင်ဖွန်းနှင့်ဆက်နွှယ်၍ သေဆုံးခြင်းဟုတ်၊မဟုတ်အကဲ ဖြတ်လေ့လာနေသည်ဟု ဆိုသည်။နောက် ထပ်လူနှစ်ဦး သေဆုံးနိုင်ဖွယ်ရှိပြီး နောက်ထပ်နှစ်ဦး ပျောက်ဆုံးနေသည်ဟု ၎င်းကထပ်မံ ပြောကြားခဲ့သည်။ လူရှစ်ဦး အပြင်းအထန်ဒဏ်ရာရခဲ့ပြီး နောက်ထပ် ၇၀ ခန့် ဒဏ်ရာအနည်းငယ်ရရှိခဲ့သည်ဟု ဟာရာရှီက ဆိုသည်။တိုင်ဖွန်းမုန်တိုင်းကြောင့် ပြတင်းပေါက်မှန်များ အက်ကွဲပြီး ခေါင်မိုးများလန်ခဲ့ကာ အဆောက်အအုံ ၂၀၀ နီးပါး ပျက်စီးခဲ့သည်။ ဒေသတွင်းရှိ တိုင်ဖွန်းမုန်တိုင်းများသည် ရာသီဥတုဖောက်ပြန်ပြောင်းလဲမှုကြောင့် ကမ်းရိုးတန်းများနှင့် ပိုမိုနီးကပ်စွာ ဖြစ်ပေါ်လာပြီး ပိုမိုလျင်မြန်စွာ ပြင်းထန်လာသည့်အပြင် ကုန်းတွင်းပိုင်းသို့ ပိုမိုအချိန်ကြာမြင့်စွာ တိုက်ခတ်ကြောင်း ဇူလိုင်လက ထုတ်ပြန်သည့် သုတေသနစစ်တမ်းတစ်ရပ်တွင် ဆိုသည်။ အစောပိုင်း မိုးလေဝသ ပြန်လည်သုံးသပ်သည့် နည်းစနစ်ကို အသုံးပြု၍ Imperial College London က သြဂုတ် ၃၀ ရက်တွင် လျင်မြန်သော ခွဲခြမ်းစိတ်ခြာသုံးသပ်ချက်ကို ထုတ်ပြန်မှုတွင် တိုင်ဖွန်းရှန်ရှန်း၏ လေတိုက်နှုန်းသည် ကမ္ဘာကြီးပူနွေးမှုကြောင့် ၂၆ရာခိုင်နှုန်း ပိုမိုပြင်းထန်ခဲ့သည်ဟု ဆိုသည်။.
