mpox ကာကွယ်ဆေးများအတွက် UNICEF က အရေးပေါ် တင်ဒါခေါ်ယူ

မကြာသေးမီက mpox ရောဂါကူးစက်မှုကို အဆိုးရွားဆုံးခံစားနေရသည့် နိုင်ငံများကို ကူညီပေးရန်အတွက် mpox ကာကွယ်ဆေးများကို အရေးပေါ်တင်ဒါခေါ်ယူခဲ့ကြောင်း ကုလသမဂ္ဂကလေးသူငယ်များဆိုင်ရာ အေ ဂျင်စီက သြဂုတ် ၃၁ ရက်တွင် ပြောကြားခဲ့သည်။ “mpox ကာကွယ်ဆေးတွေ ထုတ်လုပ်မှုကို အရှိန်မြှင့်တင်တာအပါအဝင် mpox ကာကွယ်ဆေးတွေကို ချက်ချင်းရရှိဖို့အတွက် အရေးပေါ်တင်ဒါ ခေါ်ယူခဲ့တာဖြစ်ပါတယ်”ဟု UNICEF က ကမ္ဘာ့ကျန်းမာရေးအဖွဲ့ (WHO)၊ Gavi ကာကွယ်ဆေးထောက်ပံ့ရေးမဟာမိတ်အဖွဲ့၊ အာဖရိက ရောဂါထိန်းချုပ်ရေးနှင့် တားဆီးရေး ( Africa CDC တို့နှင့်အတူ ပူးတွဲအစီရင်ခံစာ ထုတ်ပြန်ခဲ့သည်။ “ကာကွယ်ဆေးလိုအပ်ချက်၊ ကာကွယ်ဆေးထုတ်လုပ်သည့် ကုမ္ပဏီများ၏ ထုတ်လုပ်နိုင်စွမ်း၊ ရန်ပုံငွေတို့အပေါ် မူတည်ပြီး ၂၀၂၅ ခုနှစ်အထိ ကာကွယ်ဆေးအလုံးရေ ၁၂ သန်းကို ထုတ်လုပ်ရန် သဘောတူညီချက်များ လုပ်ဆောင်သွားမည်ဟု ထုတ်ပြန်ချက်တွင် ဖော်ပြခဲ့သည်။ အရေးပေါ်တင်ဒါခေါ်ယူမှုအရ UNICEF သည် ကာကွယ်ဆေးထုတ်လုပ်သည့် ကုမ္ပဏီများနှင့် ထောက်ပံ့မှုဆိုင်ရာ သဘောတူညီချက်များရရှိရန် စီစဉ်ထားသည်။ ဒီအာရ်ကွန်ဂိုနိုင်ငံတွင် mpox ဗိုင်းရပ်စ်မျိုးကွဲသစ် Clade 1b ကူးစက်မှုကို စတင်တွေ့ရှိခဲ့ပြီး အိမ်နီးချင်းနိုင်ငံများသို့ ပျံ့နှ့ံခဲ့သဖြင့် ရောဂါကူးစက်ခံရသူများ မြင့်တက်လာမှုကြောင့် WHO သည် သြဂုတ် ၁၄ ရက်တွင် mpox ရောဂါကို နိုင်ငံတကာအရေးပေါ် အခြေအနေအဖြစ် ကြေညာခဲ့သည်။ ယခုနှစ်အတွင်း ဒီအာရ်ကွန်ဂိုတွင် mpox ရောဂါ သံသယလူနာပေါင်း ၁၈၀၀၀ ကျော်ရှိပြီး သေဆုံးသူ ၆၂၉ ဦးရှိခဲ့သည်။ သြဂုတ် ၂၈ ရက်ကမူ Africa CDC က mpox ဗိုင်းရပ်စ်ကာကွယ်ရေး အလုံးရေ တစ်သန်းနီးပါးရရှိရန် နီးစပ်နေပြီဖြစ်ကြောင်း ပြောကြားခဲ့ပြီး ကာကွယ်ဆေးထုတ်လုပ်သည့် ကုမ္ပဏီများအနေဖြင့် နည်းပညာများ မျှဝေပေးရန် တိုက်တွန်းခဲ့သည်။ “mpox ကာကွယ်ရေးအလုံးရေ တစ်သန်းနီးပါးရရှိဖို့ ကျွန်တော်တို့ ဆက်လက်လုပ်ဆောင်နေပါတယ်”ဟု Africa CDC ၏ညွှန်ကြားရေးမှူးချုပ် ဂျင်းကာဆီယာက ကွန်ဂိုနိုင်ငံတွင် ပြုလုပ်သည့် WHO ဒေသတွင်း အစည်းအဝေးတွင် ပြောကြားခဲ့သည်။ စပိန်တစ်နိုင်ငံတည်းကပင် အာဖရိကကို mpox ကာကွယ်ဆေးအလုံးရေ ၅၀၀၀၀၀ ထောက်ပံ့မည်ဟု ကတိပြုခဲ့မှုနှင့်အတူ နိုင်ငံအချို့သည် အာဖရိကနိုင်ငံများကို ကာကွယ်ဆေးများ ထောက်ပံ့ပေးမည်ဟု ကတိပြုခဲ့ သည်။mpox ကာကွယ်ဆေး အလုံးရေ ၂၁၅၀၀၀ ကို ဒိန်းမတ်နိုုင်ငံ၏ Bavarian Nordic ကုမ္ပဏီထံမှ လက်ခံရရှိခဲ့ပြီးဖြစ်သော်လည်း ကာကွယ်ဆေးထုတ်လုပ်သည့် နည်းပညာကိုပါမျှဝေရန် ကာဆီယာက ပြော ကြားခဲ့သည်။ “အာဖရိက ကာကွယ်ဆေးထုတ်လုပ်တဲ့ ကုမ္ပဏီတွေကို mpox ကာကွယ်ဆေးထုတ်လုပ်တဲ့ နည်းပညာ လွှဲပြောင်းပေးဖို့ ကျွန်တော်တို့က Bavarian Nordic ကုမ္ပဏီကို ပြောခဲ့ပါတယ်။ mpox ကာကွယ်ဆေးတွေကို အာဖရိကမှာ မကြာမီအချိန်အတွင်း ထုတ်လုပ်နိုင်လိမ့်မယ်လို့ ယုံကြည်ထားပါတယ်”ဟု ကာဆီယာက ပြောကြားခဲ့သည်။ ဥရောပသမဂ္ဂနှင့် အမေရိကန်ကဲ့သို့ အနောက်ပိုင်းမိတ်ဖက်များက mpox ကာကွယ်ရေးအလုံးရေ ၃၈၀,၀၀၀ ခန့်ျပေးမည်ဟု ကတိပြုထားကြောင်း ၎င်းက ပြောကြားခဲ့သည်။.