အငြင်းပွားဖွယ် တောင်တရုတ်ပင်လယ်မြေပုံကြောင့် Barbie ဇာတ်ကား...
တောင်တရုတ်ပင်လယ်အတွင်း တရုတ်အပိုင်ရေပိုင်နက်များအဖြစ် ဖော်ပြထားသည့် မြေပုံပါဇာတ်ဝင်ခန်းကြောင့် Barbie ဇာတ် ကားကို ဗီယက်နမ်အစိုးရက ရုံတင်ပြသခွင့် တားမြစ်ထားသည်။ တောင်တရုတ်ပင်လယ်၏ အားလုံးနီးပါးကို အပိုင်အဖြစ် တရုတ်ကသတ်မှတ်ကြေညာထားမှုအပေါ် ကန့်ကွက်သဘောမတူ သည့် နိုင်ငံများထဲတွင် ဗီယက်နမ်လည်းအပါအဝင်ဖြစ်သည်။ Barbie အရုပ်အကြောင်း ရိုက်ကူးထားသည့် ရုပ်ရှင်ဇာတ်ကားဖြစ်ပြီး ဇူလိုင် ၂၁ ရက်တွင် ရုံတင်ပြသတော့မည့်ဆဲဆဲ ပြသခွင့် အပိတ်ခံလိုက်ရခြင်းလည်းဖြစ်သည်။ တရုတ်နိုင်ငံက တောင်တရုတ်ပင်လယ်အတွင်း ကျွန်းတုများပေါ်တွင် စစ်စခန်းများ တည်ဆောက်လျက်ရှိသည်မှာ နှစ်ချီရှိပြီဖြစ် ပြီး တရုတ်အပိုင် ပိုင်နက်အဖြစ် ပိုမိုထင်ရှားစေရန် ရေကြောင်းကင်းထောက်မှုများလည်း မကြာခဏ ပြုလုပ်လေ့ရှိသည်။ ၂၀၁၆ ခုနှစ်တွင် နယ်သာလန်နိုင်ငံ၊ The Hague မြို့ရှိ နိုင်ငံတကာခုံရုံးတစ်ခုက တရုတ်ရေပိုင်နက်များအဖြစ် ကြေညာထားခြင်းကို ကန့်ကွက်ကြေညာခဲ့ပြီး တရုတ်ဘက်ကမူ ထိုဆုံးဖြတ်ချက်ကို အသိအမှတ်မပြုခဲ့ပေ။ အငြင်းပွားဖွယ်မြေပုံကြောင့် ပြသခွင့်မရသည့် ဇာတ်ကားက ဝမ်းနားဘရော့စ်ရုပ် ရှင်ထုတ်လုပ်ရေးမှ ထုတ်လုပ်သည့် Barbie ဇာတ်ကား ပထမဆုံးမဟုတ်ပေ။၂၀၁၉ ခုနှစ်တွင်လည်း အလားတူအကြောင်းပြချက်ဖြင့် Dream Works မှထုတ်လုပ်သည့် အန်နီမေး ရှင်းဇာတ်ကား Abominable ပြသခွင့် အပိတ်ခံရသည်။ ၂၀၂၂ ခုနှစ်တွင်လည်း ဆိုနီအက်ရှင်ဇာတ်ကား Uncharted ကို ဗီယက်နမ်အစိုးရက ပြသခွင့်မပြုခဲ့ပေ။ လွန်ခဲ့သည့်နှစ်နှစ်ကလည်း သြစတြေး လျစပိုင်ဇာတ်လမ်းတွဲ Pine Gap နှင့်ပတ်သက်ပြီး အာဏာပိုင်များက မကျေနပ်သဖြင့် Netflix က ဗီယက်နမ်တွင်မပြခဲ့ပေ။ ၂၀၁၈ ခုနှစ်တွင် Crazy Rich Asians ဇာတ်ကားမှ ဇာတ်ဝင်ခန်းတစ်ခုကိုလည်း ဆင်ဆာအဖွဲ့က ဖြတ်တောက်ခဲ့သည်။ Barbie ဇာတ်ကားတွင် မင်းသမီးမာဂေါ့ ရော့ဘီနှင့် မင်းသားရိုင်ယန်ဂေ့ါစလင်းတို့ ခေါင်းဆောင်ပါဝင် သရုပ်ဆောင်ထားသည်။ ဗီယက်နမ်နိုင်ငံပိုင်မီဒီယာ Tien Phong ကမူ အာဏာပိုင်များမကြိုက်သည့် ဇာတ်ဝင်ခန်းက ဇာတ်ကားထဲတွင် အကြိမ်ရေများစွာပါနေသည်ဟု ဆိုသည်။ဗီယက်နမ်တွင် ရုပ်ရှင်အားလုံးကို ဆင်ဆာလူကြီးများကစိစစ်ပြီးမှသာ ပြသရသည်။.
