နစကဥက္ကဋ္ဌ၏ အထူးကိုယ်စားလှယ်နှင့် ကမ္ဘောဒီယားဝန်ကြီးချုပ်...

ကမ္ဘောဒီးယားနိုင်ငံသို့ အလုပ်သဘောခရီးစဉ် ရောက်ရှိနေသည့် နစကဥက္ကဋ္ဌ၏ အထူးကိုယ်စားလှယ် ပြည်ထောင်စုဝန်ကြီးဦးကိုကိုလှိုင်နှင့် ကမ္ဘောဒီယားဝန်ကြီး တွေ့ဆုံခဲ့ပြီး နှစ်ဖက်အကျိုးရှိစေမည့် ပူးပေါင်းဆောင်ရွက်မှုမြှင့်တင်နိုင်ရေးနှင့် ဒေသတွင်းနှင့် နိုင်ငံတကာစာမျက်နှာတွင် ပူးပေါင်းဆောင်ရွက်မှု ပိုမိုတိုးမြှင့်ရေး ဆွေးနွေးခဲ့ကြောင်း သိရသည်။ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌနှင့် နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်၏ အထူးကိုယ်စားလှယ်အဖြစ် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌရုံးဝန်ကြီးဌာန (၂) ပြည်ထောင်စုဝန်ကြီးဦးကိုကိုလှိုင်သည် ဇူလိုင် ၃၁ ရက်မှ သြဂုတ် ၂ ရက်အထိ ကမ္ဘောဒီးယားနိုင်ငံသို့ အလုပ်သဘောခရီးစဉ် သွားရောက်ခဲ့ကြောင်း သိရသည်။ အထူးကိုယ်စားလှယ်သည် ဖနွမ်ပင်မြို့သို့ ရောက်ရှိစဉ် သြဂုတ် ၁ ရက်တွင် ကမ္ဘောဒီးယားနိုင်ငံ အထက်လွှတ်တော်ဥက္ကဋ္ဌ မစ္စတာဟွန်ဆန်အား အထက်လွှတ်တော်၌လည်းကောင်း၊ ကမ္ဘောဒီးယားဝန်ကြီးချုပ် ဒေါက်တာဟွန်မာနက်အား ငြိမ်းချမ်းရေးနန်းတော်၌လည်း သွားရောက်တွေ့ဆုံခဲ့ကြောင်း သိရသည်။ ယင်းသို့တွေ့ဆုံစဉ် အထူးကိုယ်စားလှယ်က မြန်မာနိုင်ငံအတွင်း လက်တလော ဖြစ်ပေါ်တိုးတက်မှုများ၊ အာဆီယံတူညီဆန္ဒ ငါးချက်နှင့် နိုင်ငံတော်စီမံအုပ်ချုပ်ရေးကောင်စီ၏ ရှေ့လုပ်ငန်းစဉ်ငါးရပ် အကောင်အထည် ဖော်ဆောင်ရွက်မှုများနှင့် နိုင်ငံအတွင်း တရားမျှတသည့် ရွေးကောက်ပွဲကျင်းပရန် ကြိုတင်ပြင်ဆင်လျက်ရှိသည်များကို ရှင်းလင်းပြောကြားခဲ့ကြောင်း သိရသည်။ ထို့ပြင် နှစ်နိုင်ငံအကြား ရှိရင်းစွဲ ချစ်ကြည်ရင်းနှီးမှု ပိုမိုခိုင်မာစေရေး၊ ခရီးသွားလာမှု၊ ချိတ်ဆက်မှုနှင့် ယဉ်ကျေးမှုကဏ္ဍများအပါအဝင် နှစ်ဖက်အပြန်အလှန် အကျိုးရှိစေမည့် ပူးပေါင်းဆောင်ရွက်မှုမြှင့်တင်နိုင်မည့် အလားအလာများ၊ ဒေသတွင်းနှင့် နိုင်ငံတကာစာမျက်နှာတွင် ပူးပေါင်းဆောင်ရွက်မှု ပိုမိုတိုးမြှင့်ရေးနှင့် ၂၀၂၅ ခုနှစ်တွင် ကျရောက်မည့် နှစ် (၇၀)ပြည့် သံတမန်ဆက်ဆံရေးထူးထောင်သည့် အထိမ်းအမှတ် အခမ်းအနားများ ကျင်းပနိုင်ရေးကိစ္စရပ်များကို ဆွေးနွေးခဲ့ကြောင်း နစက၏ထုတ်ပြန်မှုအရ သိရသည်။ ထို့အပြင် ပြည်ထောင်စုဝန်ကြီး ဦးကိုကိုလှိုင်နှင့်တွေ့ဆုံစဉ် ကမ္ဘောဒီးယားဝန်ကြီးချုပ်က မြန်မာနိုင်ငံ ပြည်တွင်းစစ်ပြဿနာကို မကြာမီကာလအတွင်း ဖြေရှင်းနိုင်မည်ဟု မျှော်လင့်ကြောင်း ပြောကြားခဲ့သည်ဟု Khmertimes သတင်းဌာနက ဖော်ပြခဲ့သည်။ ထို့အတူ အထက်လွှတ်တော်ဥက္ကဋ္ဌ မစ္စတာဟွန်ဆန်က ကမ္ဘာဒီးယားတွင် မြန်မာနိုင်ငံ ငြိမ်းချမ်းရေးအတွက် ကမ္ဘောဒီးယားကတိကဝတ်ကို ထပ်လောင်းအတည်ပြုပြီး ကမ္ဘောဒီးယားသည် မြန်မာ၏ပဋိပက္ခတွင် ဗျူဟာမြောက်နိုင်ငံရေး သို့မဟုတ် စီးပွားရေး အကျိုးစီးပွားမရှိကြောင်း ကမ္ဘောဒီးယား၏ တစ်ခုတည်းသော ရည်ရွယ်ချက်မှာ ကမ္ဘောဒီးယားသည် ယခင်က အလားတူ ပြည်တွင်းစစ်ဒဏ်ကို ခံစားခဲ့ရပြီးဖြစ်သောကြောင့် မြန်မာနိုင်ငံသားများ ကာလရှည်ကြာ ပြည်တွင်းစစ်ဒဏ်ကိုခံစားနေရမှုမှ ရပ်တန့်သွားစေရန် ရည်ရွယ်ချက်ကြောင်း ဆွေးနွေးပြောကြား Khmertimes သတင်းဌာနတွင် ဖော်ပြထားသည်။ ထို့နောက် အထူးကိုယ်စားလှယ် ပြည်ထောင်စုဝန်ကြီးဦးကိုကိုလှိုင် ဦးဆောင်သည့် မြန်မာကိုယ်စားလှယ်အဖွဲ့အား ကမ္ဘောဒီးယား အထက်လွှတ်တော် ဒုတိယဥက္ကဋ္ဌ (၁) မစ္စတာ ပရတ်ဆုတ်ခွန်းက နေ့လယ်စားဖြင့် တည့်ခင်းဧည့်ခံခဲ့ကြောင်းသိရသည်။ နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်နှင့်ကမ္ဘောဒီးယားအထက်လွှတ်တော်ဥက္ကဋ္ဌဟွန်ဆန်တို့ ၂၀၂၄ ခုနှစ် မေ ၇ ရက်က ဗီဒီယိုကွန်ဖရန့်ဖြင့် တစ်နာရီကျော်အကြာ ဆွေးနွေးခဲ့ပြီး နှစ်နိုင်ငံချစ်ကြည်ရေး၊ အာဆီယံဒေသအရေးနှင့်မြန်မာ နိုင်ငံ၌ ကျင်းပရန်ရှိသည့် ရွေးကောက်ပွဲနှင့်ပတ်သက်ပြီးလေ့လာခြင်း၊ အကြံပြုခြင်းများကို ဆွေးနွေးခဲ့ကြောင်း ထိုစဉ်က နှစ်ဖက်သတင်းထုတ်ပြန်မှုအရသိရသည်။ ထိုသို့တွေ့ဆုံမှုတွင် မစ္စတာဟွန်ဆန်က ဒေါ်အောင်ဆန်းစုကြည်နှင့် တွေ့ဆုံခွင့်ပေးရန် နစကထံ တောင်းဆိုခဲ့ကြောင်း ကမ္ဘောဒီးယားသတင်းမီဒီယာများတွင် ဖော်ပြခဲ့သည်။ အဆိုပါတောင်းဆိုခဲ့မှုနှင့်ပတ်သက်၍ လတ်တလောတွင်မဖြစ်နိုင်သေးသည့် အခြေအနေအား နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက နိုင်ငံတော်အစိုးရအနေဖြင့် ပါတီစုံဒီမိုကရေစီစနစ်၊ ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စုစနစ်ကို အာမခံပြီး ဖြစ်ကြောင်း၊ ပါတီစုံဒီမိုကရေစီအထွေထွေ ရွေးကောက်ပွဲကို မဖြစ်မနေဆောင်ရွက်မည်ဖြစ်ပြီး ကြိုတင်ပြင်ဆင်မှုများလုပ်ဆောင်လျက်ရှိကြောင်း၊ ရှေ့လုပ်ငန်းစဉ်(၅)ရပ်အတိုင်း မဖြစ်မနေဆောင်ရွက်ရန်သံဓိဌာန်များလည်း ချထားပြီးဖြစ်သဖြင့် ရှေ့လုပ်ငန်းစဉ်ကို နှောင့်နှေးစေနိုင်ရှေ့လုပ်ငန်းစဉ်များကို အနှောက်အယှက်ဖြစ်စေနိုင်သည့် လုပ်ဆောင်ချက်များ ရှောင်ရှားမည်ဖြစ်ကြောင်း ထိုစဉ်က ပြောကြားခဲ့သည်။.